بالراحة بس وواحدة واحدة ومن غير خناق،😅 بعد ما إتكلمنا عن أضرار السكر، هنتكلم عن أضرار السكر الناتج عن العصاير الفريش... خلينا ناخد مثال؛😊
التفاحة🍎 مثلاً فيها ١٠ جرام سكر, ونسبة إحتياج الجسم من السكر اليومي حوالي ٣٠ جرام بتختلف من الراجل والست…
عشان تستخلص كوباية عصير تفاح إنت محتاج حوالي ٣ تفاحات يعني كل إحتياجك اليومي من السكر، من غير ما تقرب من أي حاجة تانية، بصورة أبسط كوبايتين عصير في اليوم بتديك ضعف إحتياجك من "إجمالي" السكر اللي محتاجه جسمك، واللي بيزيد عن إحتياجه بيتخزن على هيئة دهون وبيأثر على الشرايين والقلب و الدماغ و غيره…😕
=طيب ما أنا لما آكل تفاح هاخد نفس النسبة! 🤓
- ده صحيح مع مراعاة إن مش طبيعي ناكل 6 تفاحات، لكن هتاخد مع كل تفاحة صوديوم، ماغنسيوم، بوتاسيوم، كربوهيدريتس، الياف، بروتين، فيتامين سي، سكر، و غيره، كل العناصر الغذائية دي بتقل بعد عصرها بنسب قد تصل الى أكتر من ٩٠٪ 🤷♂️
مثلاً البروتين بيقل من ٠.٣ جرام الى .٠.١ جرام، فيتامين سي بينزل من ٧٪ الى ١٪، الألياف بتنزل من ٢.٤جرام الى ٠.٢ جرام…
ما عدا السكر، بيفضل زي ما هو من ١٠ جرام الى ١٠ جرام برضه، فالعصير نفسه بيبقى 88% مياه و 9% سكر والباقي كاربوهيدرات، عشان كدة ببساطة إنت تقريباً حرفياً بتشرب مياه بسكر بطعم التفاح.
فبالتالي أكل الفاكهة نفسها أحسن طريقة للإستفادة منها، ومش معنى كده إن كل العصير غلط، لكن الطريقة الصحية الوحيدة لشرب العصير هي ضرب الفاكهة نفسها مش عصرها، مع مراعاة الكمية برضه...
زي الفراولة 🍓 مثلاً اللي أولاً سكرها قليل وثانياً مش بيترمي منها حاجة عشان هي نفسها بتتضرب.، عصير جوز الهند 🥥 (اللي بيبقى جوة الثمرة نفسها) سكره قليل ومفيد جداً.
وإحنا بنتكلم طبعاً على ضرب الفواكه منغير أي إضافات، مياه أو سكر أو خلافه وللأسف معظم الفواكه ما بينفعش معاها الضرب، في حاجات لازم تتعصر أو تتقشر زي البرتقال والتفاح وغيره.
إختار اكلك، إختار حياتك.